CEBU CITY – Mas subsob karun ang gipahigayon nga security effort sa armadong kusog arun nga dili makaplastar ang rebeldeng grupo sa ilahang dautang plano.
Kini subay na sa nagsingabot nga ika-51 nga anibersaryo sa Communist Part of the Philippines-New People’s Army-National Democratic Front (CPP-NPA-NDF) karung umaabot nga Disyembre 26.
Gibutyag ni Captain Joe Patrick Martinez, ang deputy commander sa 3rd Civil Relation Group sa Central Command, nga matag tuig na lang nagpahigayon ug anibersaryo ang rebeldeng grupo ug susamang ilaha na kining gipasigarbo dungan sa paghimo ug kadaut.
Matud ni Capt. Martinez nga wala gayud muhunong ang mga tropa sa gobyerno sa pagpahigayon ug operasyon batok sa mga New People’s Army (NPA).
Gisiguro niini nga usa kini ka ‘whole nation initiative’ arun nga mapakgang ug mapulbos ang CPP-NPA-NDF sa ilahang kagustohan nga makuha ang gobyerno sa Pilipinas.
Nagkanayon si Capt. Martinez nga dili nila tugutan nga aduna pa’y mga sibilyan nga mangamatay nga mugna sa rebeldeng grupo susama na lang sa nahitabo sa Borongan City, Eastern Samar.
