Nag-atubang og reklamong child abuse ang usa ka tanod sa Barangay Kamagayan, dakabayan sa Sugbo, gumikan sa giingong pagpanghinol ngadto sa usa ka 12-anyos nga lalaki.
Kini human nga mireklamo ang pamilya ni alyas Janjan ngadto sa buhatan sa Parian Police Station batok sa suspek nga si July Olmos, 35 anyos niadtong Biyernes.
Base sa imbestigasyon sa otoridad, gipatawag sa tanod si Alyas Janjan human sa ilang pagpractice og sayaw.
Matud ni Patrolwoman Maria Cecila Tulid sa Women’s and Children’s Protection Desk (WCPD), nga gipugos ni Olmos ang ulittawo nga makighilawas kaniya.
Pagkalabay sa pipila ka adlaw, nag-atubangay sa barangay hall ang pamilya sa biktima ug ang tanod kalabot sa maong alegasyon.
Dugang pa ni Tulid nga wala na nagpakita sa barangay ang maong tanod human kini mi-angkon sa maong pasangil.
Kasamtangang gipangita sa kapulisan ang maong barangay tanod alang sa pagkasikop niini.
Kung madakpan, mag-atubang ang suspek og kasong psychological and sexual abuse.
Samtang gipaubos pa sa medical examination ang biktima.
