CEBU – Naghangyo karun ug hinabang ang mayor sa Daanbantayan, Cebu kung diin naapektohan usab sa bagyong Ursula.
Sa pakighinabi sa Bombo Radyo Cebu kang Daanbantayan Mayor Sun Shimura, gibutyag niini nga nagpadayon pa ang ilahang assessment sa danyos nga gibilin sa bagyo apan iyahang gipadayag nga daghan sa ilahang lungsod ang apektado ilabi na ang mga mananagat ug mga mag-uuma.
Matud ni Mayor Shimura nga basi sa ilahang initial assessment nga anaa sa 4.4 million pesos ang danyos sa mga tanaman, P750,000 sa live stocks ug ang nangaguba nga 88 ka mga bangka ang mikabat ug 2 million pesos.
Samtang, padayon sa gihapon ang ilahang assessment sa mga nagusbat nga imprastraktura lakip na niini ang ilahang fishport, cultural center nga nahimo usab nila nga evacuation center, ug mismo ang ilahang municipal building.
Giklaro sa mayor nga anaa sa P3 million na lang ang nahabilin sa ilahang calamity fund.
Sigon pa nga ang ilahang lungsod ang kanunay nga maigo ug bagyo hinungdan nga ang nahisgutang pondo na lang ang nahibilin.
Anaa usab sa kapin 19,000 ka pamilya usab ang apektado sa bagyong Ursula ug 1,619 niini ang nawagtangan gayud ug panimalay.
Subay niini, nanuktok karun si Mayor Shimura sa mga adunay malumo ug kasingkasing nga tabangan ang iyahang katawhan nga subling makabarug human sa katalagman.
Hilabihan nga gikinahanglan karun ang mga materyales alang sa pagtukod ug panimalay, paghimu ug mga bangka alang sa mga mananagat, ingon man mga trapal.
Hinuon, nagpasalamat na lang si Mayor Shimura nga walay casualty sa ilahang lungsod human nga mikuso-kuso ang bagyong Ursula.
Kahinumdoman nga usa ang lungsod sa Daanbantayan ang hilabihan nga naapektohan sa bagyong Yolanda niadtong 2013.
