Mag-atubang ug kasong reckless imprudence resulting to double homicide ang kapitan sa paraw sailboat ug ang assistant niini sa Bohol.
Kini human nalumos ang duha ka Chinese national sa dihang nahulog kini tunga-tunga sa kadagatan gumikan sa kusog nga balod.
Nahitabo ang maong insidente tunga-tunga sa kadagatan sa Barangay Doljo, Panglao, Bohol.
Giila ang kapitan sa paraw sailboat nga si Rufino Labastida, 46-anyos ug ang assistant niini nga si Randy Anligues, 24-anyos.
Nagtingkagol karon sa Panglao PNP ang duha samtang gihikay pa ang kaso nga ipasaka niini.
Gibutyag ni Lt. Junior Grade Michael John Encina ang tigpamaba sa Philippine Coast Guard (PCG) 7, nga nilawig ang maong sailboat nga walay clearance gikan sa PCG.
Nasuta sa imbestigasyon nga ang sailboat nakasugat ug kusog nga balod hinungdan sa pagkahulog sa duha ka chinese national.
Dugang pa sa tigpamaba nga wala naka-life vest ang maong mga turista nga sakay sa sailboat gumikan wala man gayud kini na inspeksyon sa PCG kabahin sa seguridad sa paglawig niini.
Samtang nanawagan si Encina sa katawhan ilabi na gayud sa mga turista nga dili i-tolerate ang mga colurom nga sakyanang pandagat gumikan susama lang ug gibutang natu sa alanganin ang kinabuhi niini. (Lahvi Quiñones)
