CEBU CITY – Gikalipay sa usa ka lumad nga taga Lipa City, Batangas ang pagtinabangay sa mga Batangueño ug sa mga LGUs alang sa mga apektado sa pagboto sa Bulkang Taal.
Sa eksklusibo nga pakighinabi sa Bombo Radyo Cebu kang Mabel Aguila, 38 anyos, gibutyag niini nga bisan pa man ug anaa sila sa 14 km danger zone radius, dako usab ang epekto sa volcanic ash sa ilahang panginabuhian.
Kini gumikan ang Taal Volcano Island ug Taal Lake ang daghang isda nga tawilis ug tilapia.
Dugang pa niini nga dako usab kini nga pagkaguba sa ilahang turismo.
Apan giklaro usab ni Aguila nga gitabangan na sila sa LGUs ug nalipay kini sa gipakita nga pagtinabangay sa mga Batangueño diin wala nila gi-una ang ilahang mga kaugalingon.
Sa pagkakarun, giingong medyo kalmado pa ang sitwasyon sa Lipa, Batangas apan gipahimangnoan na sila sa ilahang local government nga kung mahimo, magpabiliin na lang sulod sa ilahang panimalay ug maggamit ug face mask.
Andam na usab sila sa kung unsa man ang mahitabo.
