Gipangita karon sa kapulisan ang 19-anyos nga out-of-school youth kinsang gituohang nanunggab sa usa ka 15-anyos nga tinun-an sa sulod sa tunghaan sa Barangay Cabancalan, dakbayan sa Mandaue.
Giila ang suspek nga si Mark Niño Donayre, 15 anyos, ug nagpuyo sa Brgy. Casuntingan sa susamang dakbayan.
Matud ni Police Corporal Shem Saranillio sa WCPD sa Casuntingan Police Station nga nakaangkon og samad-dinunggaban ang 15-anyos nga Grade 9 student human kini giingong kaupat nang giduslak sa suspek ang balisong sa iyang tiyan.
Nakita ni Saranillo nga misangput ang maong insidente gumikan lang sa selos.
Base sa imbestigasyon, mi-atake si Donayre, dala ang iyang balisong, sa dihang misulod ang biktima sa comfort room.
Nasayran nga hilabihang nagselos ang suspek human nahibaw-an nga adunay mutual understanding ang iyang kanhi girlfriend ngadto sa 15-anyos nga ulit-tawo.
Giingong mibahad si Donayre sa iyang ex-girlfriend nga kung dili sila magbalik, adunay mahitabong dautan sa bag-ong love interest sa dalagita.
Miresponde ang mga gwardya sa tunghaan human sa maong insidente apan miikyas dayon ang suspek.
Sa kasamtangan, nagpaalim pa sa tambalanan ang ulit-tawo nga biktima human nga nahimong stable ang kondisyon niini.
