CEBU CITY — Mipadayag ang Department of Education (DepED)-7 nga angayang magtinabangay ang mga ginikanan ug magtutudlo aron makahulma og maayong karakter ang mga anak.
Matud ni DepED-7 director Dr. Salustiano Jimenez nga kuwang usahay ang pagtudlo sa mga Filipino values ngadto sa tagsa-tagsa ka panimalay maong angayang itudlo usab kini sa mga tunghaan.
Hinungdan nga suportado sa ahensya ang pagpabanhaw sa Good Manners and Right Conduct (GMRC) subject sa mga pribado ug publiko nga tunghaan ubos sa K-to-12 curriculum program.
Dugang pa ni Jimenez nga dako ang epekto sa tekonolohiya ngadto sa karakter sa mga anak ilabi na kung anaa na sa puberty stage.
Kini bisan pa man og adunay makuhang pagtulun-an o values ang teknolohiya alang sa mga tinun-an.
Gihimug-atan ni Jimenez nga adunay kontribusyon ang matag usa alang sa pag-practice sa mga kinaiya sa Pilipino ngadto sa mga tinun-an.
Sa kasamtangan, pirma na lang ni Presidente Rodrigo Duterte ang kuwang aron himoon nang balaud ang GMRC bill human na-ratify sa Kamara niadtong nakalabay nga semana.
