CEBU CITY – Gipaubos na karun sa usa ka confirmatory test alang sa Coronavirus Disease 2019 (COVID-19) ang swab sample sa 27 anyos nga Person
Under Investigation (PUI) kinsang namatay dinhi sa dakbayan sa Sugbo.
Sa eksklusibo nga pakighinabi sa Bombo Radyo kang Cebu City Councilor Dave Tumulak, gibutyag niini nga basi sa death certificate sa nahisgutang pasyente, namatay kini gumikan sa acute respiratory syndrome secondary to high risk pneumonia ug acute kidney injury secondary to septic shock kung diin giangkon sa opisyal nga kini matawag na nga COVID-19 suspect.
Matud pa nga naka-confined ang nahisgutang pasyente sa usa ka pribado nga tambalanan niadtong unang semana sa Pebrero gumikan sa TB-meningitis apan nakagawas usab pagkahuman sa duha ka semana.
Niadtong Marso 10, subli kini nga na-admit sa usa ka pangpubliko nga tambalanan human nga nakasinati ug pagpanglipong ug nagsuka ug dayun gibalhin kini sa pribado nga tambalanan alang sa dugang nga treatment.
Giangkon usab sa opisyal nga basi usab sa mga doktor, giingong adunay ubo ingon man nga naglisod ug ginhawa ang pasyente sugod niadtong Marso, hangtud nga kini namatay niadtong Marso 15, pasado alas 2 sa kadlawon.
Sa pagkakarun, gi-quarantine na ang mga close contact, lakip na ang pamilya sa nahisgutang pasyente./SBR
