CEBU CITY — Nagpabilin gihapon ang 34 ang ihap sa mga nataptan sa COVID-19 sa Central Visayas sulod na sa duha ka adlaw.
Sa report gikan sa Department of Health (DOH)-7, wala pay dugang nga nagpositibo sa COVID-19 apan nisaka ang mga nagnegatibo sa sakit o “laboratory negative” ngadto sa 10, samtang nagpabilin sa unom ang namatay.
Matud sa regional director nga si Dr. Jaime Bernadas nga sa 65 ka mga test results nga gipagawas, 63 kanila ang negatibo ug negative usab sa sakit ang duha ka mga pasyente nga nataptan sa maong sakit human gi-usban og testing.
Gipasabot ni Bernadas nga gihulipan ang ihap sa mga naayo o “recovered” og “laboratory negative” tungod kay nagpaalim pa sa tambalanan ang mga pasyente bisan pa man og negatibo sila sa repeat tests.
“Another criterion for discharge is that the patient is showing signs of improvement of symptoms. Once the repeat test is negative, patient is no longer capable of infecting another person. Some patients have already been discharged after testing negative and no longer have signs and symptoms. However, the others are still admitted due to some underlying medical conditions and are ably managed by their doctors,” suma pa sa regional director.
Dugang pa nini nga ipaubos sa repeat testing ang mga pasyente aron masuta ang kahimtang sa panglawas usa pa i-discharge.
Nagagikan ang duha sa mga pasyente nga “laboratory negative” sa dakbayan sa Sugbo ug sa Lapu-Lapu.
Samtang gikumpirmar usab ni Lapu-Lapu City Mayor Junard Ahong Chan nga i-discharge na sa tambalanan ang usa sa mga pasyente human naayo ug nagnegatibo sa maong sakit.
“Praise God, usa na lang ang nagpabilin nga confirmed case sa CoVid-19 sa atong syudad kay ang usa fully recovered na ug NEGATIVE na siya sa duha ka CoVid testing. Let’s continue to offer our prayers para sa usa ka patient nga nagpabilin nga unta maka recover na pod siya ug ma CoVid-free na ang Lapu-Lapu City,” sigon pa ni Chan.
Gitino ni Cebu Governor Gwendolyn Garcia nga walay pagsaka sa COVID-19 cases sa probinsya sa Sugbo apan misaka ang ihap sa persons under monitoring.
Matud sa gobernadora nga misaka ang ihap niini gumikan kay ang mga indibidwal nga mulusot sa probinsya nga gikan sa dakbayan sa Cebu ang ikonsiderar na nga PUM ingon man hinungdan usab kini sa international flights nga naundang ug ang mg langyaw ang natanggong sa lalawigan.
“Nisaka. Ngano man? Kay tungod sa atong panawagan gahapon nga daily reporting sa atong mga kalungsuran. Katong wa nag-report, ni-report na,” pasabot pa ni Garcia.
Awhag karon sa DOH-7 sa publiko nga magtinabangay aron momaayo ang nasud batok sa makamatay nga sakit.
“The DOH CVCHD is doing its best in making sure vital support is provided through procurement and distribution of logistics or through networking with private groups,” dason pa sa DOH-7 report. (gn/fdp)
