CEBU CITY — Nisaka pag-ayo ang mga natakdan sa coronavirus disease o COVID-19 sa Central Visayas kung diin anaa na kini sa 346.
Kini human nga nadugangan og 20 ka mga kaso sa COVID-19 gikan sa Cebu City ug Lapu-Lapu City ug laing 123 gikan sa Cebu City Jail.
Base sa report gikan sa Department of Health (DOH)-7, anaa karon sa 311 ang natakdan og coronavirus sa dakbayan sa Sugbo samtang anaa na sa 18 ang natakbuyan sa virus sa Lapu-Lapu City.
Samtang nagpabilin sa siyam ang confirmed cases sa dakbayan sa Mandaue ug walay pagsaka sa uban pang bahin sa rehiyon 7.
Giklaro karon sa DOH-7 nga ang batang nahimugso gikan sa dakbayan sa Sugbo, kinsang unang nagpositibo sa coronavirus, kay usa lang ka “false positive.”
Una nang giklaro ni Cebu City Mayor Edgardo Labella nga nagnegatibo ang maong baby boy sa coronavirus human gipaubos sa repeat testing.
Tungod niini, gitangtang kini sa listahan sa mga nagpositibo sa mga COVID-19 cases sa rehiyon.
Mipahinumdom si DOH-7 Director Dr. Jaime Bernadas nga ipatuman sa tanang panahon ang physical distancing isip usa sa mga epektibong lakang aron kalikayan ang pagkatap sa maong virus.
