CEBU CITY — Wala gayud nagdahum ang usa ka kanhi sakop sa media sa Sugbo nga makapasar kini sa 2019 Bar Examinations bisan pa man sa iyang pagpaningkamot.
Sa interview sa Bombo Radyo ngadto ni Atty. King Anthony Perez, gi-angkon niini nga wala gayud ka-sink-in sa hunahuna ang maong maayong balita ug hilabihan ang kalipay niini.
Matud ni Perez, kinsang usa ka kanhi TV reporter, nga gipaningkamotan niini ang labing lisud nga eksaminasyon pinaagi sa subsob nga pagtuon ug hugot nga pagtuo sa Ginoo.
Pursigido usab kini sa pagtuon sa kursong abogasiya sa University of Cebu – College of Law, sanglit damgo niya ang mahimong usa ka abugado.
Dugang pa niini nga nakalinya nang daan ang iyang umaabot nga propesyon sanglit may kalabutan man usab sa kanhi niyang trabaho nga mao ang pag-alagad sa kinabag-ang Pilipino.
Gamiton, matud pa, ang iyang pagka-abugado sa kasamtangang trabaho niini isip Communications and Advocacy Officer sa Children’s Legal Bureau, Inc.
Kini aron maalagaran ang mga bata ug mga kababayen-an kinsang nanginahanglan og tinuod nga hustisya.
Gipasalamatan ni Perez ang iyang pamilya nga maoy inspirasyon sa pagpaningkamot ug sa Labaw nga Makagagahum kinsang naggiya kaniya.
