CEBU CITY — Niabot na sa 1,081 ang mga pasyenteng natakdan sa coronavirus disease o COVID-19 sa tibuok Central Visayas, human nga nadugangan og 91 ka mga bag-ong kaso gikan sa Sugbo.
Base sa latest report gikan sa Department of Health (DOH)-7, nag-una gihapon ang dakbayan sa Sugbo diin niabot na og 900 ang ihap sa mga kumpirmadong kaso human nadugangan og 25 ka mga bag-ong kaso.
Niabot na sa 39 ka mga tawo ang natakdan og coronavirus sa dakbayan sa Lapu-Lapu human nga napun-an og laing lima.
Samtang nisaka ngadto sa 89 ang confirmed cases sa COVID-19 sa dakbayan sa Mandaue human nadugangan og 60 gikan sa mga piniriso sa Mandaue City Jail.
Upat na ka mga health workers ang nagpositibo sa virus human nadugangan og usa ug nagpabilin sa 17 ka mga repatriates ang nagpaalim sa quarantine human nataptan sa virus.
Gawas sa lalawigan sa Sugbo, walay namatikdang pagsaka sa mga kaso sa Bohol, Negros Oriental, ug Siquijor.
Matud ni DOH-7 Director Dr. Jaime Bernadas nga anaa na sa libuan ang natakdan sa COVID-19 diin bunga kini sa subsob nga contact tracing sa managlahing komunidad.
Lauman usab, matud pa, ang posibleng pagsaka sa mga confirmed cases sa rehiyon nunot na sa ipahigayong strategic community testing karong semanahan sa Cebu City, Mandaue City, ug Lapu-Lapu City.
