CEBU CITY — Gikumpirmar sa BAYAN-Central Visayas nga gisikop sa mga sakop sa PNP ang pipila sa mga nagprotesta atubangan sa University of the Philippines (UP) Cebu Campus.
Kini subay na sa ilang kahingawa tungod sa pagpasar sa Anti-Terrorism Bill human napasar sa ikatulo ug katapusang pagbasa niini sa Kongreso.
Lakip sa mga gipangsikop mao silang Jaime Paglinawan, ang chairman sa Bayan Central Visayas, Johanna Veloso (NUSP), Al Ingking, Bern Cañedo (Yanat Cebu), Dyan Gumanao (Kabataan Partylist), Nar Porlas, ug Janry Ubal (Food Not Bombs Cebu).
Matud ni Jaime Paglinawan nga igo lang nga nipadayag sa ilang kasagmuyo tungod sa paspas nga pagduso sa maong balaudnon.
Dugang pa niini nga aduna untay trabahuon ang gobyerno alang sa mga apektado sa COVID-19 crisis sama lang sa paghatag og ayuda sa mga gipanggutom.
Nasubo usab kini sa ilang gidangatan ilabi na nga wala sila masayud kung unsa man ang ilang nahimong kalapasan.
Samtang nahinabi sa Bombo Radyo Cebu atol sa tulumanong Bombohanay sa Udto, naputol ang maong conversation human nga giingong gibadlong sa kapulisan si Paglinawan.
Kasamtangang gikustodiya ang pito sa mga nagprotesta sa lock up cell sa Cebu City Police Office (CCPO) human nga giingong nakalapas sa general community quarantine (GCQ) protocols. (GN)
