CEBU CITY — Naglaum si Atty. Elaine Bathan ang former governor sa Integrated Bar of the Philippines (IBP) Eastern Visayas ug karon University of San Jose Recoletos School of Law, Assistant Dean nga dili mahimong balaud ang Anti-Terrorism Bill.
Matud ni Bathan sa dihang nahinabi sa Bombo Radyo Cebu sa tulumanong Dura Lex Sedlex nga naa matud pa’y mga ‘certain provisions’ ang naasoy nga balaudnon ug naa matud pa kini siyay pagduha-duha.
Gihimug-atan, sa manlalaban nga ang nakalatid sa naasoy nga balaudnon ang sukwahi sa constitution, ilabina ang warrantless arrest , ingon man sa “basic” ug “fundamental freedom”, ug “presumption of innocence” sa usa ka tao.
Kini mao matud pa ang mas nakita ni Bathan nga ‘hanap’ sanglit sa unang higayon sa kasaysayan, nausab na ang depenesyon sa kanhi balaud nga napasar niadtong 2007 nga mao ang Human Security Act.
Klaro matud pa sa maong balaud ang depenisyon sa terrorismo apan niining maong bagong balaudnon ang matud pa “vague” kun hanap ug angayan nga lingkuran ug tun-an pa og maayo.
Dugang pa ni Bathan nga delikado usab kini kung hisgutanan na ang freedom of speech kung diin delikado para usab sa media. (fdp)
