CEBU CITY-Wala mahunong ang operasyon sa Philippine Health Insurance Corporation (PhilHealth) Region 7, bisan pa man sa kontrobersiya nga gikalambigitan sa ilahang ulohan nga buhatan.
Gibutyag ni Dina Cinchez, ang Public Relation Officer sa PhilHealth Region 7, sa ekslusibong pakighinabi sa Bombo Radyo Cebu nga nagpadayon ang ilahang mga services diin nag-provide sa gihapon sila sa mga insurance coverage sa ilahang mga members.
Hinuon, sa pagkakarun, mas daghan ang mi-avail sa ilahang COVID-related assistance, apan nagpadayon ang ilahang serbisyo alang sa uban pang coverage.
Samtang, giangkon usab ni Cinchez nga mikunhod gayud ang ilahang premium collection sukad nga nagsugod ang COVID-19 pandemic diin daghan ang nawagtangan ug panginabuhi-an, apan adunay pipila nga gipadayon sa gihapon ang ilahang paghatag ug kontribusyon pinaagi sa ‘individual paying’.
Bisan pa man niini, gisiguro ni Cinchez nga magpadayon ang ilahang serbisyo alang sa mga miyembro sa PhilHealth.| SBR
