CEBU CITY — Gisubay sa PNP ang motibo sa pagpamusil-patay kagabii sa usa sa mga suspek sa usa ka robbery incident sa may Sitio Superior, Baranggay Looc, dakbayan sa Mandaue City.
Giila ang biktima nga si Juvilyn Terante, 43-anyos, ug usa sa gitumbok nga suspek sa J Center Mall robbery incidente niadtong nakalabay nga tuig.
Matud sa imbestigador nga si Police Staff Sgt. Wilken Enricoso, nga bag-o lang nakagawas si Terante sa Mandaue City Jail human nipyansa ug giubanan kini sa live-in partner nga si Aileen Gilbero.
Sa dihang nakalakaw ang robbery suspect gikan sa prisuhan, kalit lang nga mihunong ang usa ka van nga walay plaka ug mikanaog ang duha ka wala mailhing mga lalaki.
Gisaysay ni Enricoso nga gibunlot sa mga mamumuno ang ilang armas ug gipusil katulo ka higayon ngadto ni Terante.
Wala hinuon makatuo ang kapikas sa kalit nga kamatayon ni Terante human nakaangkon og samad-pinusilan sa ulo ug lawas.
Gipalawman pa sa kapulisan ang imbestigasyon aron masubay kung kinsa man ang responsable sa maong pagpamusil.
Usa si Terante sa gitumbok nga mga responsable sa nahitabong pagpangawat sulod sa J Center Mall niadtong Oktubre 28, 2019 ug napriso kini sa kasong robbery. /reports by Bombo Joann Gantalao/GN
