CEBU CITY — Mirekomendar ang Department of Health (DOH)-7 nga mas maayong magpabilin sa modified general community quarantine (MGCQ) ang tibuok rehiyon siyete.
Kini human nga nagpabiling ubos ang mga natalang kaso sa COVID-19 sa rehiyon diin nakatala na karon og 28 ka mga bag-ong kaso, suma pa sa ilang latest case bulletin.
Gumikan sa ubay-ubay nga ihap sa mga nangaayo, anaa na sa 1,652 ang ihap sa active cases gikan sa 20,855 ka mga cumulative cases.
Matud sa tigpamaba ug chief pathologist sa DOH-7 nga si Dr. Mary Jean Lorreche nga delikado ang rehiyon sa posibleng pagsaka sa mga kaso sa COVID-19 gumikan lang sa mas gipaluag nga quarantine restrictions.
Kini bisan pa man og na-flatten the curve o nihinay ang mga natalang kaso sa coronavirus sa rehiyon.
Dugang pa niini nga dako ang posibilidad sa subling pagsaka sa mga kaso gumikan sa giingong grabeng kakumpyansa sa mga tawo.
Giklaro karon ni Lorreche nga dili pa karon ang haum nga panahon aron mobalik sa normal ang pamuyo sanglit nagpabilin pa ang epekto sa pandemya.
Nagpabilin karon sa MGCQ status ang tibuok Central Visayas karong buwan sa Oktubre.
