CEBU CITY — Gikatakdang moduso ang PNP og kasong rape batok sa usa ka 19-anyos nga lalaki ug tulo ka menor de edad human gituohang nangmolesitiya sa duha ka mga dalagita sa Brgy. Valladolid, Carcar City, Cebu.
Gisaysay sa desk officer nga si Police Master Sgt. Mon Tecson nga nahitabo ang giingong pagpanglugos niadtong Oktubre 7 sa gabii diin nagtagay ang nahisgutang mga ulit-tawo sa usa ka balay.
Nasayran nga anaa sa 13 ngadto sa 19 anyos ang pangidaron sa mga suspek.
Matud ni Tecson nga gumikan sa tumang kahubog, giingong gitabang sa mga suspek ang pagpanglugos ngadto sa mga biktima, kinsang pulos 15-anyos ang pangidaron niini.
Pagkaugma, daling misumbong ang usa sa mga biktima ngadto sa iyang inahan hinungdan nga nagpatabang kini sa mga sakop sa kapulisan.
Daling miresponde ang mga otoridad sa balay sa usa sa mga suspek ug nasikop diha dayon.
Natanggong sa prisuhan ang 19-anyos nga suspek samtang anaa sa kustodiya sa DSWD ang tulo ka mga batan-ong lalaki.
Samtang gipaubos na sa medico legal examination sa Vicente Sotto Memorial Medical Center ang duha ka mga dalagita ug ipaubos usab kini sa stress debriefing. /GN
