CEBU CITY — Nasinati ang pipila ka lugar sa dakbayan sa Sugbo ug mga kasikbit nga lugar og pagbaha sa kadalanan ug mga pagdahili sa yuta sa mga bukirang barangay, gumikan sa kusog nga uwan nga dala sa pagpanugdog.
Sa pagronda sa Bombo Patrol kagabii, pipila ka mga kalsada sa syudad sa Sugbo ang gibah diin naglisod ang mga sakyanan nga makalabang ug na-stranded sa taas nga lebel sa tubig.
Sa dalan E. Sabellano sa Brgy. Quiot Pardo ning dakbayan sa Sugbo, nakasinati ang mga motorista og hangtud sa tuhog nga pagbaha.
Subay pa sa Social Media sa Cebu City Disaster Risk Reduction and Management, adunay pipila ka mga indibidwal ang gipangita human naanod sa tubig-baha.
Usa sa mga gipangita mao ang usa ka 16-anyos indibidwal kinsang naanod sa Kamputhaw River sa may dalan Gen. Maxilom, samtang laing usab nga missing ang na-report gikan sa Laguerta, Lahug.
Nasayran nga hangtud sa hawakan ang gitas-on sa baha sa dalan General Maxilom Avenue.
Inabagan sa Cebu City Bureau of fire, Emergency Medical Services, ug Quick Response Team, girespondehan usab ang lain nga pagbaha nga natala sa Sitio Panaghiusa sa Brgy. Duljo Fatima, Alviola St. sa Brgy.Tejero, Brgy. Busay ug Brgy. Pulangbato.
Gumikan niini daling nipadala si Cebu City Mayor Edgardo Labella ug Department of Social Welfare and Services (DSWS) sa Brgy. Pulangbato ug mga banig, tubig, ug makaon sa 257 ka mga indibidwal nga naapektuhan sa pagbaha ug kasamtangan nagpasilong sa Pulangbato Elementary School.
Samtang duha ka panimalay ang naanod sa Sitio Tring-Tring ug Sitio Turil sa Brgy. Tingub, sa dakbayan sa Mandaue kagabie human mi-awas ang Butuanon River.
Matud ni Brgy. Turil Councilor Jovela Jayme nga gipanag-iya ang usa mga balay nga naanod ni Ramil Miñoza gumikan nihumok ang yuta nga gitukoran sa balay tungod sa ni-apaw nga tubig-baha.
Dugang usab sa konsehal nga adunay gi-respondehan nga pagdahili sa yuta sa mga naasoy nga Sitio diin anaa sa 171 ka mga pamilya ang gi-rescue gumikan sa pagsaka sa tubig.
Apil usab sa naapektuhan ang pipila ka sitios sa Brgy. Paknaan sa ni-awas nga Butuanon River. /ekp/gn
