CEBU CITY — Nabalaka ang Philhealth Anti-fraud legal officer ug Whistleblower nga si Atty Thorrsson Montes Keith sa iyang seguridad human miduso og cyberlibel case ang President ug CEO Ricardo Morales batok kaniya.
Sa eksklusibong interview sa Bombo Radyo Cebu ngadto ni Keith, gi-angkon niini nga wala pa nakadawat o nabasa ang complaint apan nahibulong kini kung unsang motibo ang nagtukmod kang Morales.
Unang gihimug-atan ni Morales sa iyang affidavit nga apektado ang iyang kinabuhi ug ang iyang pamilya human gituohang nalambigit sa halapad nga korapsyon sa ahensya
Ang iyang personal nga seguridad ang gitan-aw karon ni Keith diin kinahanglan pa kining mogawas aron tubagon ang kasong giduso ni Morales batok kaniya.
Gihingusgan usab ni Atty. Keith nga wala kini gisulti nga dautan sanglit igo lang nga gibulgar ang kamatuoran alang sa mga namayad sa Philhealth contributions.
Apan nalipay usab kini sa kasamtangan administrasyon sa state health insurer diin gi-ayo ang tanang mga hiwi human sa maong kontobersiya. (ekp/gn)
