CEBU CITY — Giimbestigaran karon sa mga sakop sa Lapu-Lapu City Police Office (LLCPO) ang laing insidente sa pagpangawat sa City Hall kung gisulod sa mga kawatan ang City Prosecutor’s Office.
Base sa nahipos nga report gikan sa Lapu-Lapu Police Station 3, nadiskubrehan sa janitor nga nitingog ang burglary sa takna nga alas-7:50 sa buntag kagahapon.
Nabantayan sa janitor nga naguba ang door lock sa pultahan sa entrance maong dali kining na-report sa iyang supervisor.
Nadiskubrehan nila nga guba usab ang lock sa mga cubicle offices sa mga assistant prosecutors ug naabli ang desks sa mga staff.
Nakuha sa mga kawatan ang usa ka pistola nga adunay unom ka mga bala, mga personal nga butang, ug cash nga wala pa matino kung pila ang balor niini.
Sigon pa usab sa kapulisan nga nagbantay ang duha ka security guard sa Hall of Justice lobby sa dihang nitingog ang burglary nianang panahona.
Nakig-alayon na karon ang Lapu-Lapu City PNP ngadto ni Mayor Junard “Ahong” Chan aron subayon ang laing pagpangawat.
Kini na ang ika-upat nga insidente sa kawat human nga gisulod sa mga kawatan ang tulo ka mga buhatan sulod sa City Hall.
