CEBU CITY — Nahimong malampuson ang paglusad sa Balik Turismo Travel Fair sa Hoops Dome sa dakbayan sa Lapu-lapu subay na sa hinay-hinay nga pagbangon taliwa sa COVID-19 crisis.
Kini ang nahimong paghulagway ni Lapu-lapu City Mayor Junard “Ahong” Chan pinaagi sa social media post niini.
Niadtong Sabado, Oktubre 17, ubay-ubay ang mga nakadaug og mga papremyo sama sa libreng round trip flight, libreng one night stay, cellphone load, ug uban pa.
Nagpa-uwan usab kini atol sa programa og dagkung diskwento gikan sa mga nagkadaiyang hotel ug resorts sa syudad, mga airlines ug tour providers.
Kini ang nahimong pag-enganyo ni Chan sa hinay-hinay nga pagbangon sa ekonomiya pinaagi sa pagbangon sa turismo.
Tinguha usab sa mayor nga mabalik ang panginabuhian pinaagi sa industriya sa turismo, ilabi na sa liboan ka mga Oponganon nga nawad-an og trabaho tungod sa pandemya.
Gipasalamatan ni Mayor Chan ang iyang kapikas ug Chairman sa Lapu-Lapu City Tourism Cultural & Historical Affairs Commission nga si Cindi Chan, apil na ang mga staff niini alang sa malampusong paglusad sa programa. (ekp/gn)
