CEBU CITY — Makig-alayun ang hepe sa Talamban Police Station nga si PCapt. Jonathan Taneo ngadto sa Mandaue City Police Office (MCPO) kabahin sa mga insidente sa mga nakit-an nga “chop-chop” nga parte sa lawas sa tawo.
Kini aron masuta ang posibleng koneksyon sa mga missing nga usa ka tiil ug usa ka kamut nga nakit-an Brgy. Looc, sa dakbayan sa Mandaue ngadto na sa usa patayng lawas sa babaye nga walay ulo, kamut, ug tiil nga nakit-an sa Sitio Kalubihan, Brgy. Talamban, sa dakbayan sa Sugbo.
Matud pa ni Taneo nga adunay posibilidad nga magtakdo ang mga missing body parts nga unang nakit-an niadtung Oktubre 24, adlaw nga Sabado, sa Brgy. Talamban.
Sa pagkakaron, nagpadayun gihapon ang autopsy report kabahin sa mga nakit-ang parte sa lawas kung diin anaa kini karon sa usa ka punerarya sa dakbayan.
Samtang, gibutyag usab ni Taneo nga adunay duha ka pamilya ang niduol sa mga otoridad og nagpailang mga tagtungod sa patay’ng lawas.
Apan gihimug-atan niini nga kinahanglan una mogawas ang autopsy report arun nga masayran kung mo-matched kini sa mga ni-claim.
Dugang pa ni Taneo nga ipadayun gihapon sa iyang mga sakup ang retraction sa sapa nga kung asa nakit-ang lawas arun mangita og dugang nga missing body parts.
Kini aron masayud kung unsa ba ang pangalan o ilhanan sa maong biktima. (ekp/gn)
