CEBU CITY — Patay ang usa ka lalake nga nagbisikleta lang human nalatayan sa usa ka bus kagahapon sa M.C. Briones Highway sa dakbayan sa Mandaue.
Giila ang biktima nga si Sandy Ursal, 45 anyos, taga Sitio Kagay, sa lungsod sa Borbon, sa lalawigan sa Cebu ug usa ka security guard.
Samtang, giila ang drayber sa ceres bus nga gipanag-iya sa Vallacar Transit Inc. nga si Jerito Cabahug, 39 anyos, lumulupyo sa Brgy. Guadalupe, dakbayan sa Bogo.
Nagkanayon ang imbestigador gikan sa Mandaue City PNP PSSg. Ruben Dayun, nga pareho og direksyon ang biktima ug ang ceres bus, diin nag-una ang biktima sakay sa iyang bisikleta, apan mi-overtake ang bus sa usa ka intersection.
Miresulta kini sa pagkasaghiran niini sa bike ug nalatayan ang biktima sa ligid sa luyong bahin sa bus.
Gidala sa tambalanan ang biktima apan gideklarar kini sa mga doktor nga dead on arrival.
Kasamtangan pang nga naka-hold sa mga kapulisan ang Cabahug ug mag-atubang og kasong reckless imprudence resulting to homicide.
Lakang sa LTFRB-7
Nanawagan si Land Transportation, Franchising, and Regulatory Board (LTFRB-7) Regional Director Eduardo Montealto sa mga drayber ug dagkung bus o mga sakyanan nga amping kanunay sa dalan ug kini ang mo-adjust kanunay.
Matud pa ni Montealto nga duha na ka show-cause order ang ilang gipadala sa Vallacar Transit Inc. ang tag-iya sa Ceres Bus tungod na usab sa mga sunod-sunod nga aksidente.
Kahinumdumang nagbangga ang susamang bus ug usa ka ambulansya sa Gen. Maxilom Avenue niadtong Oktubre 25 diin miresulta kini sa pagkaangol sa siyam ka mga tawo.
Dugang pa ni Montealto nga nakamatikod ang ahensya nga giingong pulos mga human error ang mga nahitabong aksidente sa dalan. (report by Bombo Joann Gantalao/ekp/gn)
