CEBU CITY — Gitataw sa National Quincentennial Committee nga klaro ang gustong ipaabot ni Presidente Rodrigo Duterte nga ang katawhan mismo ang mangunay sa pagsaulog sa mga labing mahinungdanong bahin sa kasaysayan.
Kini sama lang sa ika-500 nga anibersaryo sa Kristyanismo sa Pilipinas, ingon man ang kadaugan ni Datu Lapu-Lapu sa Mactan Island batok ni Ferdinand Magellan.
Matud ni OPAV Undesecretary Jonjie Gonzales, nga maoy usa sa mga myembro sa NCQ, nga dili “Euro-centric” ang pagsaulog sa kasaysayan nga mao ang unang circumnavigation sa kalibutan pinaagi sa ekspedisyon ni Ferdinand Magellan.
Nakita ni Gonzales nga naglibong ang katawhan kung nganong mibisita ang mga Espanyol ug gi-highlight ang maong ekspedisyon pinaagi sa pagdunggo sa barkong Juan Sebastian Elcano.
Apan giklaro nang daan sa NCQ pinaagi sa executive committee nga kinahanglang iselebrar ang quincentennial commemoration sa nasud sa Pilipino nga paagi.
Dugang pa niini nga ang framework sa Quincentennial commemoration sa nasud dili ang mismong pagdiskubre ni Magellan sa Pilipinas, inay ipakita lang ang pagkatawhanon kon humanity sa matag usa.
