CEBU CITY — Gisiguro sa Archdiocese of Cebu nga mosanong sa mga lagda sa kwarantina karong ipahigayon ang mga dagkong kalihukan alang sa 500th Year of Christianity sa Pilipinas sunod semana.
Gikatakdang magsugod ang maong kasaulugan sa usa ka kick-off ceremony karong Abril 4 kung diin ablihan ang “Holy Door” sa Cebu Metropolitan Cathedral.
Pagasundan usab kini sa triduum celebrations diin adunay ipahigayong motorcade pagkahuman sa matag santos nga misa.
Ipahigayon ang Holy Mass baptism sa 100 ka mga bata sa Archdiocesian Shrine of Our Lady of Guadalupe karong Abril 11.
Pagasundan usab kini sa misa ug Confirmation 100 ka mga faithful Catholics sa National Shrine of St. Joseph, Mandaue City karong Abril 12.
Samtang adunay pagbunyag sa mga hamtong karong Abril 13 sa simbahan sa Birhen sa Regla sa Lapu-Lapu City.
Espesyal ang pagpahigayon sa re-enacment sa Unang Pagbunyag karong Abril 14 sa Magellan’s Cross kung diin usa sa mga bisita mao ang Papal Nuncio to the Philippines nga si Most. Rev. Charles John Brown.
Matud ni Fr. Mhar Vincent Balili, ang secretary-general sa executive committee, nga gisumiter nang daan ang mga lakang sa archdiocese ngadto sa Inter-Agency Task Force.
Dugang pa niini nga daan na silang nakigsabot sa mga local chief executives alang sa pagpahigayon sa mga kalihukan.
Apan mipahimangno kini nga posibleng adunay mga kabag-uhan kung magkagrabe man COVID-19 situation sa Sugbo.
Samtang mihangyo si Cebu Archbishop Jose Palma nga magtinbangay ang mga Katoliko ug otoridad alang sa luwas nga kasaulugan sa maong selebrasyon.
Matud niini nga kinahanglang ipakita sa ubang probinsya nga kayang makontrolar sa mga Sugbuanon ang sitwasyon ilabi na nga gihan-ay nang daan ang maong mga kalihukan.
Ilabi na karon nga nagkahinay ang mga natalang kaso sa COVID-19 sa Sugbo, base sa mga reports sa Department of Health (DOH)-7.
