CEBU – Usa ka kanhi chef sa London, United Kingdom ang Polish nga vlogger nga si Damian Drazek.
Niadtong 2010, miretiro kini aron matuman ang dugay na niyang plano sa pagbiyahe sa tibuok kalibotan.
Usa sa iyang destinasyon mao ang Pilipinas ug giangkon niini nga nadani kini sa kaanindot sa nasud.
Gisuroy na niini ang Sugbo, Apo Island sa Negros Oriental, ug Pamilacan Island sa Bohol.
Samtang nagtuyok-tuyok sa lugar ug nag-record sa palibot gamit ang iyang camera, usa ka Badjao nga babaye nga giilang si Aico Ayrana ang nangutana kang Damian.
Gikatahong naibog dayon ang Polish vlogger sa matahom nga kaanyag sa dalagang Badjao ug sukad kaniadto permanente na kini moduaw sa dalaga.
Sa wala madugay, nagka-uyab ang duha ug giangkon nga dili sayon ang ilahang relasyon gumikan aduna usay babag o problemang naagian.
Apan, sa katapusan nakadesisyon gihapon nga magpakasal diin gisunod ni Damian ang Badjao tradition nga mohatag og ‘ungsod’ o dowry sa dihang gipangayo niini ang mga kamot ni Aico gikan sa iyahag ginikanan alang sa kaminyuon.
