CEBU – Gibutyag sa Department of Trade and Industry (DTI) nga nagplano ang Japanese toy car maker nga Tamiya sa pagpalapad sa ilang mga operasyon sa Pilipinas pinaagi sa pagtukod og bag-ong pabrika, nga nagbubo og binilyon ka pesos nga kantidad sa mga pamuhunan o investments.
Sa usa ka pamahayag, nagkanayon ang DTI nga gikompirmar sa chairman and president sa Tamiya nga si Shunsaku Tamiya ang desisyon sa kompanya nga mobubo og bag-ong mga pamuhunan karong tuiga nga nagkantidad og P2 bilyon alang sa bag-ong pasilidad sulod sa Cebu Light Industrial Park.
Tataw sa Trade Department nga ang bag-ong planta ug building adunay gidak-on sa 22,579 ug 30,765 square meters matag usa, nga makamugna og 300 ka dugang nga mga oportunidad sa trabaho ug makapasaka sa output ngadto sa 5% sulod sa tulo ka tuig ug sa kinatibuk-ang kapasidad sa 20%.
Nasayran nga ang tinuig nga produksiyon sa Tamiya alang sa pag-eksport karon nagkantidad ug $30 milyon, diin 80% niini ginaproduce sa Pilipinas.
Target sa kompanya nga masugdan na ang operasyon sa bag-ong pabrika nga nahimutang sa Pilipinas sa umaabot Septiyembre 2023.
