CEBU – Gipahinumdoman sa kapulisan sa Mandaue ang publiko bahin sa COMELEC liquor ban, nga ipatuman sugod sa Domingo, Mayo 8, 2022, ang adlaw nga ang siyudad magsaulog sa tinuig nga kapistahan ni St. Joseph.
Molungtad hangtod sa adlaw sa eleksyon sa Lunes, Mayo 9 ang pagdili.
Matud pa ni Police Lieutenant Colonel Franco Rodulf Oriol, deputy city director for operations ug spokesperson sa Mandaue City Police Office (MCPO),nga ila nang gipakaylap ang impormasyon ngadto sa kabarangayan,arun tabangan sila sa pagpatuman sa maong pagdili.
Matod ni Oriol nga ilang susihon ug rondahon ang tanang bahin sa dakbayan ilabi na ang mga tindahan ug kan-anan aron mapatuman ang pagdili.
Dugang pa nga ang maong pagdili ubos sa COMELEC Resolution No. 10746, ang poll body nag-ingon nga bisan kinsa nga tawo, lakip ang mga tag-iya ug tagdumala sa mga hotel, resort, restawran, ug uban pang mga establisemento nga parehas ang kinaiyahan sa pagbaligya, paghatag, pagtanyag, pagpalit, pag-alagad, o pag-inom og ilimnon nga makahubog bisan asa sa ang Pilipinas mahimong supak sa balaod.
Matud pa ni Oriol nga mahimo gihapong magsadya ang mga residente atol sa fiesta nga dili moinom og ilimnong makahubog.
Giingung ang paglapas sa resolusyon mahimong magkahulogan og pagkabilanggo.
