CEBU – Nailhan na sa mga otoridad ang mga suspek sa bomb threat sa Cebu City Hall of Justice sa North Reclamation Area sa dakbayan sa Sugbo niadtong Marso 9 ning tuiga ug gipasakaan na og tukmang kaso.
Matod pa sa Information Officer sa Cebu City Police Office, nga si Police Lt. Colonel Maria Theresa Macatangay, nga ila nang gitumbok ang duha ka mga suspek nga nagpaluyo sa bomb threat sa Qimonda Building diin nahimutang ang Cebu City Hall of Justice.
Sigon ni Macatangay, nga nailhan ang suspek pinaagi sa imbestigasyon sa Regional Anti-Cybercrime Unit nga mao usay mopasaka og kaso sa mga suspetsado.
Gitino sa opisyal nga ang maong panghitabo usa ka hugot nga pasidaan ug usa ka “matang” nga pahinumdom sa mga nagpasiugda og bomb threat.
Bugtong tuyo nga nakit-an sa otoridad nga paghimo og eskandalo ug kagubot sa maong edipisyo ang posibleng tuyo sa mga suspek.
Subling nihangyo ang CCPO sa mga Sugbuanon nga mahimong “responsable” sa pag-atubang sa mga hulga human ilang nahibaw-an nga ang text message nga adunay bomb threat niadtong Huwebes gipasa ngadto sa usa ka tawo ngadto sa lain.
