CEBU – Subay sa sunod-sunod nga pag-uwan karong semanahona, naobserbahan sa pipila ka residente sa mga piling lugar ang grabeng pagbaha bisan paman sa mga proyekto sa lokal nga kagamhanan.
Gumikan niini, eksklusibong gikahinabi sa Bombo Radyo Cebu si Cebu City Councilor Jerry Guardo kinsa mao usay chairman sa committee on infrastructure.
Gi-angkon ni Guardo, nga sa pagkakaron dili pa angayang lauman ang hingpit nga pagkasulbad sa problema sa baha.
Kini tungod on-going pa ang ubang proyekto sa nagkadaiyang kasapaan sa dakbayan gawas usab niini medyo adunay uban nga nalangay pa gumikan sa nagkdaiyang isyu diin lakip na nga adunay pipila ka luna nga gipanag-iya pa sa pribadong sektor.
Apan, mapasigarbuhon usab si Guardo nga bisan paman wala pa mahuman ang ubang proyekto, wala naman silay nadawat nga taho nga adunay pay nasinating pagbaha sa mga lugar diin nahuman na ang proyekto sa sapa.
Hangyo nalang ni Guardo sa katawhan nga patas-an gamay ang pasensya gumikan kung ugaling mahuman na ang tanang proyekto maminusan ang pagbaha nga nagdala og perwisyo sa publiko.
