CEBU – Nadakpan sa Miyerkules sa udto, Hunyo 29, 2022 sa hiniusang pwersa sa kapulisan sa probinsya sa Sugbo ang suspek sa pagtulis ug pagpatay sa babayeng negusyante ug pagkaangol sa kabanay niini sa lungsod sa Aloguinsan sa Dominggo sa hapon, Hunyo 26, 2022 sa Barangay Lagtang, siyudad sa Talisay tulo ka mga adlaw human sa krimen.
Giila ang nasikop nga si James Harvey Nengasca, kinsa gialarma nga armado sa Barangay Lagtang.
Matod ni Police Lieutenant Colonel Mark Gifter Sucalit, deputy provincial director for operations sa Cebu Police Provincial Office (CPPO), nakadawat og impormasyon ang kapulisan nga adunay armadong tawo sa maong barangay nga nihaom sa hulagway sa suspek sa pagpatay sa Barangay Bonbon, Aloguinsan.
Gilusad dayon ang operation uban sa Talisay City PNP ug Aloguinsan Police Station nga miresulta sa pagkasikop ni Nengasca.
Kahinumdoman nga si Nengasca ang ni-unay pagtulis-patay sa iyahang iyaan nga si Arsenia Nengasca Alindani niadtong Dominggo ug nidunggab usab sa lain pa niyang iyaan, nga si Belen Nengasca Biton.
Giandam na ang kasong murder ug frustrated murder lakip na ang laing kaso nga illegal possession of firearm nunot sa nakuhang armas sa iyang posisyon.
