CEBU – Nimando si Cordova Mayor Cesar “Didoy” Suan nga imbestigasyon ang mga expired goods nga napalgang naka-stock sa Cordova Evacuation Center sa Barangay Gabi.
Gidumala ang evacuation center sa Municipal Disaster Risk Reduction and Management Office (MDRRMO).
Aksidente nga nadiskubrehan ni Suan ang expired goods human niya gihimo ang inspeksyon sa MDRRMO niadtong Huwebes, Hulyo 28, 2022.
Nagkanayon si Mayor Suan, nga subo lang palandungon nga wala pa kini maapod-apod ngadto sa mga Cordovanhon sa dihang maayo pa kining kan-on o imnon, apan dili kini gusto nga basulon ang miaging administrasyon, ug gusto niini mahibal-an kung ngano nga gitugotan kini nga mahitabo.
Gimando usab sa mayor ang pag-imbentaryo sa mga expired nga mga butang aron makalkulo ang kantidad niini, ug hangyoon niini ang Gobernadora nga dili lang kini pabayaran sa LGU, gumikan kay dako-dako usab kini nga kantidad.
Nasayran nga lakip sa expired nga mga butang nga nadiskobrehan mao ang mga pakete sa instant noodles, gatas, kape, ug bugas.
