CEBU – Gilaraw karon sa kagamhanan sa dakbayan sa Talisay nga mag-umol og usa ka elite police force sa syudad gumikan nagkadaghan na ang ilahang populasyon.
Kini ang gitataw mismo sa committee chairman sa Committee on Peace and Order sa konseho nga si Konsehal Gail Restauro, diin nagkanayon kini nga sa kasamtangan wala pay Special Weapons and Tactics (SWAT) team ang syudad diin nagkadaghan na ang ihap sa ilahang katawhan ug nagkinahanglan na og usa ka elite force nga maoy motutok sa kahapsay ug kalinaw sa ilahang lugar.
Dugang pa ni Restauro nga sa pagkakaron nagpadayon ang ilahang pakig-alayon sa Talisay City Police Station chief PLt Col. Randy Caballes aron usab mabansay ang maong mga police nga himuong miyembro sa SWAT team.
Sa inisyal nga nasabutan, mokuha lang una sa mga existing police sa Talisay Police Station ug gastohan kini sa syudad aron usab ma-training ug mamahimong miyembro sa maong team.
