CEBU – Gidakop ang usa ka empleyado sa usa ka food manufacturing company sa lungsod sa Compostela sa amihanang Sugbo human nisuway og palusot og usa ka botelyang chlorine nga nagkantidad og P61 gikan sa maong establisemento.
Giila ang suspek nga si Florito Puyos Pelit, 28, minyo, taga Sitio Camanggahan, Barangay Don Gregorio Antigua, lungsod sa Borbon, amihanang Sugbo, empleyado sa sanitation sa maong manufacturing company.
Mogawas na unta si Pelit sa lugar sa kompanya human sa iyang duty alas 5:11 sa hapon, Huwebes, Agosto 11, 2022, dihang na-intercept kini sa security guard nga si Jubert Cayangnong Luchavez, 39, taga Purok Daghol, Barangay Guinsay, dakbayan sa Danao, human napalgan ang usa ka botelyang chlorine sa iyang bag atol sa routine inspection.
Gituohan nga ang chlorine maoy suplay sa pagpanglimpyo sa housekeeping department sa kompanya.
Human sa panghitabo, daling gi-turn-over si Pelit sa kapulisan og mag-atubang og kasong qualified theft.
