CEBU – Gibutyag ni Medellin Mayor Joven Mondigo nga dugay na nga problema sa mga ‘millers’ ang limitado nga operasyon sa Bogo-Medellin Milling Company Inc. (BOMEDCO).
Gani, usa ka buwan na nga wala’y operasyon sa naasoy nga pagalingan, butang nga gikabalak-an sa lokal nga kagamhanan gumikan dako kini ug epekto lukop probinsiya sa Sugbo, ingon man sa mga trabahante sa maong kompanya.
Gumikan niini, gi-imbetar sa konseho sa lungsod sa Medellin ang mga top executives BOMEDCO aron usab mahibaw-an kung unsa nay kasamtangang sitwasyon sa maong kompanya.
Apan atol sa eksklusibong pakighinabi sa Bombo Radyo News team kang Medellin Vice-Mayor Juan Alfonso Lim, gi-angkon niini nga nasagmuyo kini sa tinubagan sa mga opisyales sa maong kompanya.
Gikasagmuyo ni Lim ang wala paghatag sa maong kompanya og definite answer o tin-aw nga tubag kung maka-operate paba pagbalik ang maong kompanya gumikan sa habig sa kompanya magdepende pa kini sa bank lenders.
Gumikan niini, wala usay makuha nga tin-aw nga tubag ang mga empleyado ug daw sama sa igo lang kini nihatag og silaw sa paglaum.
