CEBU – Giangkon sa usa ka opisyal sa Department of Education (DepEd) 7 nga sa 4,671 ka pampubliko ug pribadong tunghaan sa rehiyon, mokabat sa 3,475, o 75 porsiyento, ang kuwangan sa classrooms.
Apan sa press conference niadtong Biyernes, gipasabot ni DepEd 7 Director Salustiano Jimenez nga dili mominus 1,000 ka mga classroom nga naguba sa bagyong Odette (Rai) niadtong Disyembre 16, 2021 ang nagamit na human giayo.
Gibanabanang moabot sa duha ka milyon ang turnout sa mga estudyante, lakip na ang mga late enrollees ug transferees, hangtod sa Agosto 25.
Sa Agosto 26, 1,999,363 ka mga estudyante ang opisyal nga na-enrol alang sa school year 2022-2023.
Nadawat sa DepEd 7 ang P1.2 bilyones nga budget alang sa pag-ayo sa mga trusses, atop ug kisame sa mga guba nga classrooms apan nalangan ang proyekto gumikan wa makapahigayon og public bidding ang ahensya alang sa repair works nga gidili atol sa election period.
