CEBU – Nakabsan sa kinabuhi ang duha ka mga lalaki human ang gisakyan nilang motorsiklo nabangga sa likod sa SUV pasado alas 9 sa gabii niadtong Biyernes, Septiyembre 23, subay sa national highway sa Barangay Tulay, lungsod sa Minglanilla sa habagatang Sugbo.
Naangol usab sa aksidente ang usa sa duha ka tawo nga nagsakay sa pillion o usa sa mga backriders kinsa mao ra ang naluwas sa pagkahagsa ug nagpaalim sa iyang mga samad sa tambalanan.
Giila ni Police Lieutenant Crisanto Arreglo, deputy chief of police sa Minglanilla Police Station ang mga namatay sa pagkabangga nga sila si Janrenan Omambac, 28, drayber sa motorsiklo; ug Nencris Omambac, 31, usa sa mga backriders; ug ang duha pulos residente sa Sitio Kapayawan, Barangay Colon sa dakbayan sa Naga.
Dugang pa, nga ang backrider nga naangol ug naluwas sa pagkabangga mao si Mark Lester Pardillo, 33, taga Barangay Colon.
Matod ni Arreglo nga giangkon sa kabanay sa mga biktima nga nag-inom og ilimnong makahubog ang tulo ka mga lalaki sa wa pa sila mipadagan sakay sa motorsiklo.
Sa imbestigasyon sa kapulisan, nga kusog ang dagan sa motorsiklo nga gimaneho ni Janrenan uban sa iyang duha ka backriders ug ni-overtake sa laing sakyanan sa iyang atubangan ang gimaneho nga traysikol.
Samtang ang kabanay sa mga biktima nakighusay na sa drayber sa SUV.
Nisaad usab ang drayber sa SUV nga abagahon ang tanang galastohan sa mga biktima.
Subling gipahinumdoman usab ni Arreglo ang mga motorista nga magmatngon kanunay sa pagdrayb ug dili gyud magmaneho kon ubos sa impluwensya sa ilimnong makahubog.
