CEBU – Dili makasulbad sa problema sa basura ang pagtukod ug usa ka waste-to-energy (WTE) project sa dakbayan sa Sugbo.
Gibutyag ni Cebu City Councilor Nestor Archival, nga dako kini nga problema gumikan kay posibli nga magbayad niini ang dakbayan ug kapin sa P2,000 matag tonelada sa basura nga sunogon matag adlaw.
Matud pa, gi-aprobahan ang maong proyekto apan wala pa’y kasayoran ang tanan kung asa kini itukod, ingon man nga wala pa’y kasiguradohan nga musugot ang mga tawo sa dapit kung asa itukod ang maong pasilidad.
Dugang pa sa konsehal nga gi-aprobahan ang maong proyekto apan wala pa usab masayri kung pila ug kanus-a ang bahin niini sa dakbayan, diin gikinahanglan nga adunay garantiya ug dili porsyento lang ang makuha sa dakbayan.
Gitino ni Archival nga maayo ang pangandoy nga mahimong Singapore ang dakbayan apan lisod kini nga makab-ot bisan pa man ug maabot kini ug 10 katuig gumikan sa kalahi sa kultura diin simpli nga balaud sa pag-‘segregate’ sa mga basura, wala man masunod sa katawhan.
