CEBU – Nihangyo sa 80 ka mga barangay kapitan ang kadagkoan sa Cebu City’s Environmental Sanitation and Enforcement Team (CESET) nga i-deputize ang ilang mga tanod aron makatabang sa pagmintinar sa kalimpyo sa ilang tagsa-tagsa ka hurisdiksyon.
Kini ang gibutyag ni Grace Luardo, ang garbage czar sa dakbayan, nga ang CESET personnel ug barangay environmental officers (BEOs) kung ihiusa moabot lang sa 242, hinungdan nga ang maong kasamtangang manpower dili paigo sa pagdumala sa reklamo sa mga regulasyon sa paglabay sa basura sa mga barangay.
Matod ni Luardo nga gikinahanglan ang deputization sa mga tanod sanglit aduna man usab mga barangay nga walay BEO o kadtong mga opisyal nga dili mosuporta sa kampanya sa paglabay sa basura sa administrasyong Rama.
Apan, wala niya gitumbok ang mga ngalan sa maong mga barangay.
Dugang pa, nga sa gikatakdang pagpatuman sa Oplan Disiplina ni Mayor Michael Rama karong buwana, mas seryuso na ang CESET ug ubang hingtungdan nga mga buhatan sa city hall sa pagpatuman sa pagdakop sa mga malapason.
