CEBU – Mokabat sa duha ka kilo sa gituohang shabu ang nasakmit sa mga sakop sa Cebu Provincial Drug Enforcement Unit nga mobalor og P13.6 milyones karong buntag sa Brgy.Tayud, Bayan ng Consolacion Cebu.
Nadakpan ang High Value Individual (HVI) Regional Level drug suspect nga si Dondonico Duaban, 26 anyos, construction worker ug nagpuyo sa nahisgutang lungsod.
Sa pakighinabi sa Bomboradyo Cebu kang Police Regional Office (PRO-7) Regional Director PBGen. Roderick Augustos Alba niingon nga ang nasangpit nga malampusong operasyon resulta sa dul-an sa duha ka buwan nga pagpaniid sa drug activity sa suspek kansang tinubdan mao ang iyang igsuon nga si Mark Duaban kinsa natanggong sa Cebu City Jail.
Dugang pa ni PRO7 Director Alba nga makig-alayon siya sa mga opisyal sa BJMP7 aron mahatagan og pagtagad ang problema nga gawasnon gihapon ang mga drug suspects sa paghimo og mga transaksiyon sa ilegal nga drugas bisan og anaa na sa prisohan.
Samatang ang suspek nga si Duaban, nipili sa di pagkomento dihang gipangutana kon kinsa ang iyang mga kauban sa pagduso sa gidili nga mga butang.
