CEBU – Sikop sulod sa usa ka depasaheroang barko ang usa ka giingong sakop sa Abella Criminal Gang, kinsa wanted sa kasong murder ug homicide niadtong Huwebes, Nobyembre 3, 2022.
Nasignit sa mga operatiba sa Criminal Investigation and Detection Group Cebu Field Unit, uban sa Cebu City Mobile Force Company ug Regional Intelligence Unit (RIU-7), ang akusado nga si Argie Abella, 37, molupyo sa Barangay Busay sa dakbayan sa Sugbo.
Nadakpan si Abella human kini gipasakaan og kasong murder ni Judge Ma. Lynna Pacamalan Adviento, presiding judge sa Regional Trial Court Branch 58 sa dakbayan sa Sugbo niadtong Marso 10, 2022 nga walay girekomendar nga piyansa.
Gipasakaan usab si Abella niadtong Septiyembre 4, 2022, sa kasong homicide ni Judge Ricky Jones Macabaya, presiding judge sa Regional Trial Court Branch 5 sa dakbayan sa Sugbo og P120,000 isip piyansa nga girekomendar.
Nasayran nga nibyahe ang akusado ubos sa ngalan sa iyang ig-agaw.
