CEBU – Nakompleto na ang P1.2-bilyones nga Lusaran Bulk Water Project nga makahatod og 20 milyones ka litro nga tubig matag adlaw ngadto sa Metropolitan Cebu Water District (MCWD).
Tumong sa unang component ang duha ka modular water tanks sa Barangay Busay samtang padayon pa nga nagtrabaho ang JFAP Construction sa ikaduhang component, nga mao ang piping gikan sa Busay paingon sa JY Square sa Barangay Lahug.
Giklaro ni Atty Joey Daluz , ang chairman sa MCWD , nga ang tibuok dakbayan sa Sugbo maoy makabenepisyo sa maong tubig apan mag-una lang kini sa Lusaran ug sa mga bukirang barangay.
Hinuon, gitataw ni Daluz nga dili pa hingpit matagamtaman ang full operation delivery gumikan wala pa mahuman ang piping gikan sa Busay paingon sa JY Square.
Gani, nagkanayon kini nga nakigpulong na kini sa contractor aron matiwas ang piping gumikan gusto niini nga hingpit na nga madeliver ang tubig sa dili pa ang Pasko.
Kahinumdoman nga nipasar og resolusyon ang MCWD board nga nagtugot sa JE Hydro nga maka-supply og dugang 15 milyones ka litro nga tubig aron mas daghang panimalay ang makabaton og tubig nga mainom.
