Gipakatap sa Cebu City Police Office (CCPO) ang mga police personnel alang sa ‘weeklong activities’ sa dakbayan subay sa ika-86 katuig nga Charter Day karung umaabot nga Pebrero 24, 2023.
Gipahibalo ni Police Colonel Ireneo Dalogdog, ang director sa CCPO, nga ilahang gipanghingusgan ang paghatag ug seguridad lukop dakbayan ilabi na nga adunay mga opisina nga nag-request ug security alang sa ilahang mga ipahigayon nga aktibidad.
Matud ni Colonel Dalogdog nga gimandoan na niini ang Cebu City Mobile Force Company (CMFC) nga magpahigayon ug 24 oras nga pag-‘roving’ sa mga kadalanan sa dakbayan, ingon man sa mga lugar nga adunay daghang tawo.
Atol sa Charter Day, gimandoan usab niini ang tanang station commanders gikan sa Police Station 1 hangtud sa Police Station 11 nga magpahigayon ug 24 oras nga checkpoint.
Gipahibalo usab sa police director nga pa-igo lang ang personnel sa CCPO sa paghatag ug seguridad alang sa naasoy nga aktibidad ug wala na sila nagkinahanglan ug mga augmentation.
