Gi-aprubahan na sa Cebu Provincial School Board (CPSB) ang dugang nga supplemental budget nga nagkantidad og P51.6 milyones alang sa Department of Education (DepEd) Cebu Province, lakip na ang pondo sa ikaduhang provincial sports meet karong tuiga ug dugang nga temporaryong mga pasilidad sa pagtuon.
Gikan sa kinatibuk-ang kantidad, ang P20 milyones gamiton sa pagtukod og dugang nga temporaryong mga pasilidad sa pagtuon (TLS) sa Cordova ug Danao City, samtang ang P22 milyones ipang-apod-apod ngadto sa 44 ka local government units (LGUs) nga moapil sa provincial sports meet nga gikatakda karong Disyembre.
Diin ang matag LGU nga moapil makadawat og P500,000 nga ayuda, laing P9.5 milyones ang gamiton alang sa pagpahigayon sa provincial meet, lakip na ang mga uniporme ug pagkaon alang sa mga opisyal sa torneyo ug mga kawani sa DepEd. Samtang, ang nahabilin nga P100,000 gamiton alang sa mga kinahanglanon sa operasyon sa CPSB nga gipangulohan ni Gobernador Pamela Baricuatro.
Matod ni DepEd Cebu Schools Division Superintendent Senen Priscilo Paulin, kinahanglan nga magpahigayon ang division og laing provincial sports meet tungod sa mga kausaban sa kalendaryo sa eskwelahan.
Nakapahigayon na ang division sa ilang provincial meet niadtong Pebrero, gamit ang budget nga anaa kanila alang sa maong kalihokan. Apan, ubos sa giusab nga school calendar, ang regional sports competition ipahigayon human sa kataposang instructional block sa kasamtangang tuig sa pagtuon. Nagpasabot kini nga kinahanglan magpahigayon ang division og laing provincial meet karong Disyembre aron sa pagpili ug pag-andam sa mga atleta alang sa regional competition sa Marso 2027.
