PROVINCE OF CEBU-Gipalawman pa karun sa Naga City Police Station ang aksidente sa kadalanan nga gikamatay sa usa ka motorista human nga giingong gigukod sa enforcement team sa Land Transportation Office (LTO 7).
Gipahibalo ni Police Lieutenant Colonel Junel Caadlawon, ang hepe sa Naga City Police Station, nga ilahang giawhag karun ang mga nakasaksi sa maong panghitabo nga mupatim-aw sa ilahang buhatan arun nga mahatagan ug hustisya ang namatyan nga pamilya.
Matud pa, nakig-alayon na usab sila sa pamilya sa biktima apan wala pa man mitunga sa ilahang buhatan alang unta sa paghatag ug testimonya o kung mupasaka gayud kini ug kaso batok sa LTO.
Gisiguro ni Police Lt. Colonel Caadlawon nga kung ugaling adunay makita nga ebidensya nga maka-suporta sa claim sa pamilya sa biktima kay siento porsyento ang ilahang paghatag ug suporta alang sa hustisya nga ilahang mahatag.
Sa pagkakarun, giingong dili makahatag ug ispekulasyon ang kapulisan kalabot sa maong insidente.
Kahinumdoman nga niadtong Pebrero 20 kay na-aksidente ug namatay ang usa ka Julian Cañalita, Jr. human nga giingong gigukod sa mga sakop sa LTO sa dakbayan sa Naga, probinsiya sa Sugbo.
Subay niini, giingong mupasaka ug kaso ang pamilya sa biktima batok sa mga personnel sa LTO 7 kinsang nalambigit sa kamatayon sa biktima.
