CENTRAL VISAYAS-Nasakmit atol sa Simultaneous Anti-Criminality Law Enforcement Operation (Sacleo) ang P23 milyones nga balor sa ilegal nga drugas, nga gihimo sa kapulisan sa Central Visayas niadtong Pebrero 25 hangtod 28, 2023.
Ang tulo ka adlaw nga operasyon miresulta usab sa pagkasikop sa 920 ka mga indibidwal ug pagkasakmit sa daghang mga armas nga walay lisensya.
Nasikop sa kapolisan ang 225 ka mga drug personalities kinsa nakuhaan og kinatibuk-ang P3.4 kilos nga gituohang shabu nga adunay standard nga presyo sa drugas nga P23.1 milyones ug 12 gramos nga marijuana nga mobalor og P1,400.
Nadakpan usab nila ang 313 ka mga sugarol, nga kasagaran nalambigit sa ilegal nga sabong o tigbakay, ug nasakmit ang P30,700 nga bet money.
Nasikop usab ang 365 ka mga wanted personalities, lakip ang 37 ka most wanted persons, kinsa adunay pending nga warrant of arrest sa nagkalain-laing kaso.
Nasakmit usab sa kapolisan ang 184 ka walay lisensya nga mga armas ug mga eksplosibo ug gipasakaan og kaso ang 17 ka mga tawo tungod sa illegal possession of firearms.
Butang nga nagpasalamat si Police Regional Office 7 Director, Brigadier General Jerry Bearis sa iyang mga sakop sa ilang makanunayong pasalig sa pagsumpo sa krimen.
Iyaha usab nga gipasidunggan ang publiko sa paghatag kanila og impormasyon nga misangpot sa pagkasikop sa mga suspek.
