CEBU PROVINCE-Gipasabut ni Police Major Andy Michael Roque, ang hepe sa Argao Municipal Police Station, nga hangtud sa kasamtangan nagpadayun sila sa ilahang pagpangita kang Kapitan Roberto Villamora ang kapitan sa Barangay Panadtaran, lungsod sa Argao kinsa nga nipusil patay sa iyahang manghud.
Gibutyag ni Police Major Roque, nga wala sila nagpasagad ug gibuhat ang tanang mahimo niini uban ang mga kapulisan sa naasoy nga Lugar, arun mapadali ang pagsikop sa kapitan nga naka-ikyas human mipatay sa iyahang igsoon./
Nangayu ug dipensa ang opisyal sa katawhan sa Argao nga wala pa nila nasikop ang suspetsado nga nahimong hinungdan nga nakapahadlok sa katawhan sa naasoyng lugar, apan maisigon nga nibutyag nga gibuhat nila ang tanan arun sa pag resulba sa kaso.
Nihangyu usab si Major Roque sa katawhan nga sa kung kinsa man ang adunay kasayuran sa nahimutangan ni kapitan Villamora, makig-alayun sa ilahang buhatan arun sa ingun matabangan sila nga masikop kini.
