LAPU-LAPU CITY, CEBU-Gikumpirmar ni Lapu-Lapu City Police Office Director Police Colonel Elmer Lim nga adunay 233 ka mga pulis sa ilahang han-ay ang i-reassign sa Negros Oriental.
Kini subay sa direktiba ni Department of Interior and Local Governmet Secretary Benjamin “Benhur” Abalos, Jr. nga pag-tangtang sa mga pulis sa Bayawam City, Negros Oriental.
May kalabotan kini sa nahitabo nga pagpatay kang Negros Oriental Governor Roel Degamo ug laing walo pa.
Matud ni Police Colonel Lim nga ang maong ihap sa mga personnel kay mga police commissioned officers (PCO) ug police non-commissioned officers (PNCO).
Gidugang pa niini nga aduna sila’y gikonsiderar karun hinungdan nga ilaha pang gi-finalize ang listahan sa mga pangalan nga ilahang ipadala sa Negros Oriental.
Gipasabot sa opisyal ngadto sa mga pulis nga ma-deploy sa maong probinsiya nga kining tanan temporaryo lamang ug giingong mabalik kini sila sa Lapu-Lapu City Police Office kung mahuman na ang imbestigasyon ug masulbad na ang kaso sa pagpatay kang Governor Degamo.
