CENTRAL VISAYAS-Gitino ni Police Regional Office (PRO) 7 spokesperson, Police Lieutenant Gerard Ace Pelare, nga pipila na ka buwan nga wala na sa Negros Oriental ang mga pulis nga nalambigit sa Mañanita alang sa adlaw nga natawhan ni Congressman Arnolfo ‘Arnie’ Teves, Jr.
Matud pa, dugay na nga nabalhin ang mga nalambigit nga pulis, ug gani bag-o naman ang mga tawo sa Negros Oriental Police Provincial Office, ingon man nga bag-o na usab ang ilahang provincial director.
Gani, giklaro ni Pelare nga pipila ka buwan sa wala pa nahitabo ang pagpatay kang Negros Oriental Governor Roel Degamo kay wala naman sa probinsiya ang naasoy nga mga pulis.
Gihimug-atan niini nga tinguha sa Philippine National Police (PNP) nga ang tanang mabutang nga pulis sa Negros Oriental kay walay bias, walay political affiliation ug uban pa arun nga magpabilin nga neutral ang kapulisan sa mga mata sa publiko.
Samtang, sa umaabot nga barangay ug SK elections kay gipahibalo ni Pelare nga padayon ang ilahang pag-reassess sa una nang mga na ‘identify’ nga hotspot areas ilabi na niadtong adunay ‘intense political rivalry’, ingon man ang pag-lantaw usab nila karun sa mga bag-ong ma-identify nga election hotspot areas.
